2Ki 19 | NdeIBE | STEP | Inkosi uHezekhiya ithe ikuzwa lokhu, yadabula izigqoko zayo yagqoka amasaka yasingena ethempelini likaJehova.

2 Kings 19

Umbono Ngokukhululwa KweJerusalema

1 Inkosi uHezekhiya ithe ikuzwa lokhu, yadabula izigqoko zayo yagqoka amasaka yasingena ethempelini likaJehova. 2 Yathuma u-Eliyakhimu umphathi wesigodlo, uShebhina umabhalane labaphristi abangabakhokheli, bonke begqoke amasaka, baya kumphrofethi u-Isaya indodana ka-Amozi. 3 Bamtshela lokhu bathi, “Nanti ilizwi elivela kuHezekhiya lithi: Lolu lusuku lokuhlupheka lolokusolwa lolwehlazo, sinjengabantwana ngesikhathi sokuba bazalwe engekho amandla okubakhokhelela. 4 Mhlawumbe uJehova uNkulunkulu wakho uwezwile wonke amazwi omlawuli wamabutho omkhulu othunywe yinkosi yakhe yase-Asiriya, ukuba iklolodele uJehova ophilayo, lokuthi uJehova wakho uzamkhuza ngalokhu akuzwileyo. Ngakho-ke khulekela ingcosana esaseleyo.”

5 Kwathi izikhulu zenkosi uHezekhiya sezifikile ku-Isaya, 6 wathi kuzo, “Tshelani inkosi yenu lithi, ‘Nanku okutshiwo nguJehova, Ungesabi ngenxa yamazwi owezwileyo izinceku zenkosi yase-Asiriya ezingithuke ngawo.

7 Lalela! Ngizamfaka umoya ozamenza athi nxa esizwa umbiko othile, abuyele elizweni lakhe, athi angafika khonale ngenze ukuba abulawe ngenkemba.’ ”

8 Umlawuli wamabutho uthe esizwa ukuthi inkosi yase-Asiriya yayisisukile eLakhishi, wabuyela emuva lapho afumana khona inkosi isilwa loLibhina.

9 USenakheribi wemukela umbiko othi uThirihaka, uMkhushi, inkosi yase-Gibhithe wayesiza ukuzamhlasela. Ngakho wathumela njalo izithunywa kuHezekhiya, lombiko lo:

10 “Tshela uHezekhiya inkosi yakoJuda ukuthi: Ungavumeli unkulunkulu omthembileyo ekukhohlisa esithi, ‘IJerusalema aliyikunikelwa ezandleni zenkosi yase-Asiriya.’ 11 Ngeqiniso usuzwile ukuthi amakhosi ase-Asiriya enzeni kuwo wonke amazwe, ukuthi awachithile, awatshabalalisa. Wena uzaphepha na?

12 Onkulunkulu bezizwe zonke ezachithwa ngokhokho bami bazivikela na: onkulunkulu beGozani, eHarani, eRezefi labantu base-Edeni ababeseTheli-Assari? 13 Ingaphi inkosi yaseHamathi, inkosi yase-Ariphadi, inkosi yomuzi waseSefavayimi, loba eyeHena loba e-Iva na?”

Umthandazo KaHezekhiya

14 UHezekhiya wamukela incwadi eyayiphethwe yizithunywa wayifunda. Wayithatha waya layo ethempelini likaJehova wafika wayichaya phambi kukaJehova.

15 UHezekhiya wakhuleka kuJehova wathi: “O Jehova ka-Israyeli, ohlezi ngaphezu kwamaKherubhi, wena wedwa unguNkulunkulu phezu kwemibuso yonke yomhlaba. Wenzile izulu lomhlaba. 16 Akubeke indlebe yakho, O Jehova, uzwe; vula amehlo akho, O Jehova, ubone; lalela amazwi kaSenakheribi awathumelayo ukuthuka uJehova ophilayo.

17 “Yebo, O Jehova, kuliqiniso ukuthi amakhosi ama-Asiriya azichithile lezizizwe lamazwe azo. 18 Asephosele onkulunkulu bawo emlilweni abatshabalalisa, ngoba kungesibo onkulunkulu kodwa kungamatshe lezigodo kuphela, okubunjwe ngezandla zabantu.

19 Khathesi, O Jehova, Nkulunkulu wethu, sikhulule esandleni sakhe, ukuze imibuso yonke emhlabeni ibone, yazi ukuthi wena wedwa, O Jehova, unguNkulunkulu.”

U-Isaya Uphrofetha Ngokuwa KukaSenakheribi

20 U-Isaya indodana ka-Amozi wathumela ilizwi kuHezekhiya esithi: “Nanku okutshiwo nguJehova ka-Israyeli: Ngiwuzwile umthandazo wakho omayelana loSenakheribi inkosi yase-Asiriya. 21 Nanti ilizwi uJehova amlahla ngalo: “ ‘INdodakazi eGcweleyo yaseZiyoni iyakweyisa njalo iyakuklolodela. INdodakazi yeJerusalema inqekuza ikhanda lapho ubaleka.

22 Ngubani omthukileyo wamhlazisa na? Ngubani omkhalimelayo ngelizwi lakho omkhangelela phansi uzikhukhumeza? Kambe ngoNgcwele ka-Israyeli!

23 Ngezithunywa zakho uthuthele izethuko zakho phezu kukaJehova. Utshilo njalo ukuthi, “Ngezinqola zami zokulwa ezinengi ngikhwele ezingqongweni zezintaba, izingqongo eziqongileyo zeLebhanoni. Sengigamule ngawisa izihlahla ezinde zemisedari, izihlahla ezikhethiweyo zamaphayini. Sengifinyelele ezindaweni zayo ezikude, amagusu ayo abukekayo.

24 Ngigebhe imithombo yamanzi ezizweni, nganatha amanzi khonale. Ngezinyawo zami ngomisa yonke imifula yaseGibhithe.”

25 “ ‘Awuzwanga na? Kudala ngakumisa lokhu. Ezinsukwini zakudala ngakulungiselela; lamuhla sengikwenzile, ukuba wena usuphendule imizi evikelweyo, yaba yinqwaba yamatshe.

26 Abantu bayo, sebephele amandla, badangele njalo basehlazweni. Banjengezilimo ensimini, njengamahlumela aluhlaza abuthakathaka, njengotshani bumila ephahleni, obutsha buqothuleke bungakakhuli.

27 “ ‘Kodwa ngiyakwazi lapha ohlala khona lokuthi ufika uphinde usuke nini lokuthi ukhwaza kanganani kimi.

28 Ngenxa yokungikhwazela mina, lokudelela kwakho sekufikile ezindlebeni zami, ngizafaka umkhala wami empumulweni yakho lamatomu ami emlonyeni wakho, njalo ngizakwenza ubuyele ngendlela oze ngayo.’

29 “Lokhu kuzakuba yisibonakaliso kuwe, we Hezekhiya: “Lonyaka lizakudla okuzikhulela kodwa, kuthi ngomnyaka wesibili lidle amahlumela akhona. Kodwa ngomnyaka wesithathu hlanyelani livune, limani izivini lidle izithelo zazo.

30 Abaseleyo koJuda bazagxumeka impande phansi bathele izithelo phezulu.

31 Ngoba eJerusalema kuzavela insalela, kanti eNtabeni yaseZiyoni kuzavela ixuku labaphephayo. Ukutshiseka kukaJehova uSomandla kuzaphelelisa lokhu.

32 “Ngakho nanku okutshiwo nguJehova mayelana lenkosi yase-Asiriya: “Kayiyikungena kulumuzi loba itshoke umtshoko lapha. Kayiyikufika phambi kwawo ngehawu loba yakhe umduli wokuwuvimbezela.

33 Ngendlela eze ngayo izaphindela emuva, kayiyikungena kulumuzi, kutsho uJehova.

34 Ngizawuvikela umuzi lo ngiwuphephise, ngizenzela mina njalo ngisenzela uDavida inceku yami.”

35 Ngalobobusuku ingilosi kaJehova yaphuma yayabulala amadoda azinkulungwane ezilikhulu lamatshumi aficamibili lanhlanu enkambeni yama-Asiriya. Kwathi abantu bevuka ngelanga elilandelayo bafumana lezozidumbu! 36 Ngakho uSenakheribi inkosi yase-Asiriya wadiliza izihonqo wasuka. Wabuyela eNineve wahlala khona. 37 Kwathi kwelinye ilanga esethempelini ekhonza unkulunkulu wakhe uNisirokhi, amadodana akhe u-Adrameleki loSharezeri, ambulala ngenkemba, asebalekela elizweni lase-Ararathi. Ngakho indodana yakhe u-Esarihadoni waba yinkosi esikhundleni sakhe.